Струга ТЛ забележа убедлива победа од 6:0 против Арсими во натпреварот од осмото коло во Првата македонска фудбалска лига.
Главен актер на средбата беше Марјан Радески, кој постигна три гола и го предводеше својот тим до висок триумф. Со освоените три бода, Струга ТЛ стигна до 17 бодови и се искачи на второто место на табелата, два бода зад лидерот Шкендија и три пред третопласираниот Вардар.
Иако во првото полувреме беше постигнат гол, по интервенција на ВАР-системот тој беше поништен поради офсајд, па на пауза се замина без голови.
Гол-серијата започна во 57. минута, кога Радески го отвори резултатот. Десет минути подоцна истиот фудбалер повторно ја затресе мрежата за 2:0. Во меѓувреме, Арсими остана со десет играчи, откако Мислими во 62. минута заработи втор жолт картон и беше исклучен.
Стружани продолжија со нападите, а Алији во 69. минута зголеми на 3:0. Само шест минути подоцна Радески комплетираше хет-трик и донесе убедливи 4:0.
До крајот, Струга ТЛ постигна уште два гола преку Рочи и Шабани за конечни 6:0.
Учество во игри на среќа е дозволено за лица со 18+ години. Играј одговорно!