Буфон: Јас сум еден од ретките Италијанци кои преземаа одговорност

Легендарниот италијански голман Џанлуиџи Буфон се потсети на еден од најтешките моменти во поновата историја на италијанската репрезентација, елиминацијата од Босна и Херцеговина во баражот за Светското првенство.

По тој неуспех, Буфон одлучи да се повлече од функцијата шеф на делегацијата на репрезентацијата, истакнувајќи дека смета дека тоа било една од најдобрите одлуки што ги донел.

Поранешниот голман на Јувентус и италијанскиот национален тим зборуваше за тоа во подкастот „Туто ин пјаца“, каде објасни зошто веднаш по елиминацијата одлучил да преземе одговорност.

„Се покажа дека тоа беше многу добра одлука за мене. Јас сум еден од ретките Италијанци кои преземаат одговорност, заминуваат и не се обидуваат по секоја цена да се вратат“, изјави Буфон.

Одлуката, како што кажува, ја донел практично веднаш по завршувањето на натпреварот против Босна и Херцеговина.

„Оставката минута по крајот од натпреварот со Босна беше моја инстинктивна реакција. Длабоко во себе почувствував дека морам да го направам тоа. Беше спонтано, како солзи и болка во срцето.“

Иако луѓето од неговата околина го советуваа да се преиспита и размисли повторно, Буфон не сакаше да ја промени одлуката.

„Најважната задача беше да се пласираме на Светското првенство, а тоа не успеавме. Да ја претставувам својата земја беше чест. Вложив многу енергија за да ја завршам мојата работа најдобро што можам и за да ги поврзам сите делови на нашиот национален тим.“

Откако ја заврши играчката кариера во 2023 година, Буфон стана шеф на делегацијата на италијанскиот тим. По неуспехот во квалификациите, одлучи да се повлече од функцијата, но нагласи дека стои зад одлуките донесени за време на неговата работа во националниот тим, вклучително и поддршката за Ѓенаро Гатузо како селектор.

„Ни треба среднорочна и долгорочна визија и верувам дека Федерацијата ќе се промени во таа насока. Благодарен сум и привилегиран што ја имав оваа улога, дури и со ваков болен завршеток“, истакна Буфон.

Еден од најдобрите голмани на сите времиња одигра рекордни 176 натпревари за репрезентацијата на Италија, со која во 2006 година ја освои светската титула.

Неговата втора епизода во националниот тим, овој пат во раководна улога, заврши без пласман на Светското првенство. Сепак, Буфон смета дека токму со заминувањето по неуспехот покажа тоа што од почеток го бараше од себе – да преземе одговорност.