Пeрез „под опсада“: Се подготвува најголемата политичко-бизнис војна за власт во Реал Мадрид?

Флорентино През се смета за недопирлив човек во Мадрид, но изгледа дека еден шпански министер „се насочил кон него“.

Во Реал Мадрид се подготвува нешто што клубот не го видел скоро две децении, и тоа е вистинска претседателска војна. Човекот кој со години е неприкосновен владетел на Сантјаго Бернабеу, Флорентино През, првпат чувствува сериозен притисок и можност неговата позиција на чело на најтрофејниот клуб во Европа да биде разнишана.

Сè започна со изненадната одлука на През да распише предвремени избори за претседател на клубот. На прв поглед изгледаше како рутински потег на човек кој сака да потврди уште еден мандат, но шпанските медиуми тврдат дека зад сцената се крие многу посериозна приказна, обид за организирано рушење на неговата власт.

През за време на прес-конференцијата јасно нагласи дека постојат луѓе кои „делуваат од сенка“ и се обидуваат да се подготват за изборите. Таа изјава веднаш отвори бројни прашања: кој стои зад сè и зошто токму сега се обидуваат да го срушат човекот кој од Реал направи глобална спортска машина?

Според тврдењата на шпанските медиуми, клучната фигура на целата приказна е Игнасио Санчез Галан, претседател на енергетската компанија Ибердрола и долгогодишен ривал на През. Нивната конфронтација трае уште од 2006 година, кога През преку својата компанија ACS се обиде да преземе големо влијание во рамките на Ибердрола.