Тешки обвинувања за капитенот на Косово – им го продал натпреварот на Турците?!

Фудбалската репрезентација на Косово не успеа да обезбеди пласман на првото Светско првенство.

Во финалето на плеј-офот што се одигра во Приштина, тие беа поразени од Турција, по што беа изнесени сериозни обвинувања против капитенот Ведат Муриќи во јужната покраина на Србија.

Еден навивач, во разговор за телевизијата „Клан Косова“, тврдеше дека Муриќи ја продал утакмицата, што предизвика бурна реакција од самиот фудбалер. Навивачот го обвини капитенот за предавство, изнесувајќи серија аргументи за неговите сомневања.

„Главен виновник за поразот е Ведат Муриќи, капитенот и полутурчин. Ден пред натпреварот ги следев турските медиуми. Ведат Муриќи на Турците им ги дал сите информации и целата тактика за натпреварот. Пред да излезе на теренот, разговараше со турските играчи и ги гушкаше. Не се сомневам дека ја продал утакмицата, сигурно имал финансиска корист“, рече навивачот и продолжи:

„Минатата година бев на одмор во Улцињ и го видов Муриќи во хотел со целото негово семејство, сите 11 членови. Верувајте ми, го сретнував секој ден и се колнам дека никогаш не проговорија ниту збор на албански. Секогаш зборуваа само на турски. Немаше желба да победи. Ако ги анализирате неговите движења, тој едноставно не играше. Тие крокодилски солзи на крајот беа само претстава. Ведат Муриќи како капитен требаше да го мотивира целиот тим, а го направи спротивното.“

Реакцијата на капитенот на Косово не изостана. Тој објави коментар на својот официјален профил на социјалните мрежи, испраќајќи остра порака до навивачот. „Срам да ти е! Полутурчин кој зборува турски, како и многумина што се родени во Призрен, но кој е поголем патриот и се чувствува како Косовар повеќе од вас!“ започна Муриќи и продолжи:

„Мислењето дека репрезентативец во одлучувачки натпревар за својата земја би го продал натпреварот само затоа што е роден во Призрен и зборува турски – мора да имате ментални проблеми или да сте човек без гордост и почитување кон играчот кој се даде за репрезентацијата на Косово. Лично, никогаш нема да ви ја простам сета болка и сè што проживеав од првиот ден до вчера за фудбалот на оваа земја и репрезентација.!“