Охрид го претстави најголемото засилување: Целта е титула!

ГРК Охрид продолжува со амбициозно градење на тимот за следната сезона, откако клубот го потврди ангажманот на унгарскиот репрезентативец Доминик Мате. Станува збор за второ засилување на охриѓани, а воедно и едно од најзвучните имиња кое досега пристигнало во клубот.

Мате, кој денес го одбележува својот 27. роденден, е ракометар висок 202 сантиметри и игра на позицијата десен бек. Во новата сезона ќе настапува со дресот со број 23. Во Охрид доаѓа од норвешкиот Елверум, тим кој е лидер во домашното првенство и редовен учесник на европската сцена.

Зад себе има богата кариера, настапувајќи за реномирани европски клубови како ПСЖ и Киелце, како и за унгарски Балатон. Воедно, Мате е стандарден дел од унгарската репрезентација, со бројни настапи на големите меѓународни натпреварувања.

Во својата прва изјава по потписот, ракометарот не го криеше задоволството од новиот предизвик. Посочи дека проектот на клубот го убедил веднаш и изрази желба да даде значаен придонес во борбата за титулата, но и за што подобри резултати на европската сцена.

Потсетување, претходно Охрид го претстави и хрватскиот голман Дино Славиќ како прво засилување за наредната сезона, што јасно укажува на високите амбиции на клубот.