Ирска е подобра во меѓусебните дуели, но Македонија двапати ја спречила да игра на големи натпреварувања!

Иако традицијата вели дека Ирците имаат подобар биланс во меѓусебните пресметки, споменот на Македонија и денес знае да им предизвика непријатност на „островјаните“.

Во доцните 90-ти години, двете селекции водеа интересни и често драматични битки. Во четири натпревари, Ирска запиша две победи, Македонија една, а еден дуел заврши без победник. Сепак, токму тие „непланирани“ киксови против нашата репрезентација оставија длабока трага кај Ирците.

Најсветол момент за Македонија беше триумфот од 3-2 во Скопје на 2 април 1997 година. Митко Стојковски беше прецизен двапати од белата точка, а натпреварот го заокружи младиот Ѓорѓи Христов со атрактивен погодок и уште поемотивна прослава. Иако тој пораз не се покажа пресуден во битката за пласман на Мундијалот 1998 – Ирска сепак заврши далеку зад Романија и избори бараж – јасно беше дека Македонија знае да биде „тврд орев“.

Но, вистинскиот удар следеше две години подоцна. На 9 октомври 1999 година, во Скопје се одигра меч кој Ирците долго го паметат. Со победа, тие ќе обезбедеа директен билет за Европското првенство 2000. Во исто време, нивните конкуренти Хрватска и СР Југославија ремизираа во Загреб, резултат што одеше во прилог на Ирска.

Сепак, сценариото се урна во самиот финиш. Горан Ставревски во судиското продолжение погоди со глава за 1-1 и ги шокираше гостите. Бод што за Македонија немаше резултатско значење, но за Ирска значеше вистинска катастрофа.

Разочарувањето не заврши тука – во баражот со Турција, Ирците беа елиминирани поради правилото за гол на гости (1-1 вкупно), што дополнително ја засили горчината. Така, Македонија остана запаметена како репрезентација која знаела да им ги расипе најголемите соништа во клучни моменти.