Ќе се бара казна за Ливерпул: Напаѓачот на Галатасарај вчера можеше да остане без прст (Фото)

Ноа Ланг заврши во болница каде му беше извршена операција поради сериозна повреда што ја претрпе, а излегуваат нови информации поврзани со инцидентот.

Ноа Ланг мина низ вистинска драма на „Енфилд“, влегувајќи во игра само на полувремето на осминафиналниот натпревар во Лигата на шампиони меѓу Ливерпул и Галатасарај (4:0), но неговата вечер се заврши на најлош начин.

По сударот со рекламните панели покрај теренот, холандскиот напаѓач остана да лежи во големи болки, а сцените беа исклучително вознемирувачки. Лекарите му дадоа кислород на теренот пред да го пренесат на носилки.

Набрзо по натпреварот стигна потврда од Галатасарај. Ланг претрпе сериозна исекотина на палецот и мораше да биде опериран, а операцијата била извршена во Ливерпул.

“Нашиот играч Ноа Ланг претрпе сериозна повреда на десниот палец и во следните часови ќе биде подложен на операција,” објави турскиот клуб.

Сепак, целата приказна доби нова димензија!

Турскиот новинар Угур Шенпире објави фотографија од конкретниот дел од рекламниот панел кој, според него, ја предизвикал повредата. Станува збор за преклопен, исклучително остар дел во самата структура, кој во моментот на инцидентот, како што тврди тој, не бил затворен.

“Пред повредата тој дел беше отворен. Многу е остар. Кога Ланг се насочи со голема брзина, се удри со палецот на тоа место. Веднаш по повредата го затворија,” објасни Шенпире.

Се очекува УЕФА да започне истрага за да се открие како дошло до пропустот, а од Турција, сосема разбирливо, бараат строга казна за Ливерпул…

Uğur Şenpire: “Ное Ланг претрпе повреда од делот кој е обележан во кругот, кој е преклопувачки. Пред повредата, овој дел не беше затворен. Многу е остар. Кога Ное се насочи брзо, паппарам. Веднаш потоа го затворија…” pic.twitter.com/yl51ibW3zn

— Galatasaray TT Haber 🇹🇷 (@Gs_telekom) March 19, 2026