Педри инвестира милиони надвор од фудбалот

Играчот од средниот ред на Барселона, Педри, кој моментално се опоравува од повреда, започна да го диверзифицира својот приход. Шпанскиот национал, сметан за еден од најдобрите фудбалери на својата позиција во светот, финализирал договор за купување на хотел во близина на аеродромот „Адолфо Суарез Мадрид-Барахас“ во Мадрид и новата урбана патека на Формула 1, која се очекува да биде изградена во шпанската престолнина, пренесува „Ел Конфиденсиал“.

Купувањето е извршено преку холдинг компанијата „Pedrineta S.L.“, која фудбалерот на Барса ја користи за управување со своите инвестиции во недвижности. Друштвото е основано во 2023 година, како што е наведено во Трговскиот регистар. Фирмата на Педри се занимава со општа дејност во областа на недвижностите, вклучувајќи купување, продажба и изнајмување на имоти за сопствени потреби. Наскоро таа извршила зголемување на капиталот за 200,000 евра, достигнувајќи вкупна вредност од 4,2 милиони евра за реализирање на различни инвестициски проекти.

Имот со 41 соба во привилегирана зона
Новокупениот четиризвезден имот е хотелот „Villa de Barajas“, лоциран на булевар „Логронјо“ бр. 331. Тој располага со 41 соба и е насочен главно кон транзитни патници и учесници на саеми и конгреси организирани во областа.

Меѓу услугите кои ги нуди хотелот се 24-часовна рецепција, појадок на шведска маса и Wi-Fi врска, како и други стандардни удобности за објекти од негова категорија. Стратешката локација го прави практичен избор за краткорочен престој.

Друга негова предност е близината до метро станицата „Барахас“, која обезбедува брз пристап до аеродромот и до центарот на Мадрид, олеснувајќи го движењето на гостите.