Бура во Лацио: Ромањоли го блокира тренингот поради трансфер во Катар

Тензиите во Лацио достигнаа врв, откако Алесио Ромањоли одби да тренира со екипата за да издејствува своја преселба во Ал-Сад. Играчот не беше дел од тренингот во среда, покренувајќи притисок за да се реализира преминот во катарскиот клуб под водство на Роберто Манчини.

Според извештаите на „Corriere dello Sport“, Лацио не даде официјално објаснување за отсуството на Ромањоли од тренингот.

Според истиот извор, Ромањоли прифатил договор со Ал-Сад во износ од 18 милиони евра за три години и во сабота се прости со навивачите на Лацио. Но, следниот ден римскиот клуб со официјално соопштение го блокираше трансферот.

Во зимскиот преоден рок, Лацио веќе ги продаде Валентин Кастеланос и Матео Гендузи, а Ромањоли имал разговори со Маурицио Сари за да го убеди да му дозволи да замине. Односите меѓу Сари и претседателот Клаудио Лотито се веќе затегнати, а тренерот, разочаран од клупските одлуки во јануари, не сака да учествува во трансферите.