Сите натпревари на Македонија и Данска: Сме победиле само еднаш! (Видео)

Македонската и данската репрезентација низ годините имаат одиграно вкупно осум меѓусебни натпревари – шест на големите натпреварувања и два во квалификациски циклуси. Првата средба датира од Светското првенство во Хрватска, а најсилни емоции кај домашната јавност и денес предизвикува драматичниот и несреќно загубен дуел во Белград на ЕП 2012. Од поубавите спомени, секако, се издвојува победата над Данска во Скопје во 2021 година, во рамки на евро-квалификациите, меч кој воедно беше и деби на селекторската функција за Кирил Лазаров.

Статистиката е јасна и немилосрдна – од вкупно осум натпревари, Македонија има само една победа, додека Данска славела на седум, без ниту едно реми меѓу нив.

Историјата на меѓусебните дуели покажува доминација на скандинавската селекција, но и неколку натпревари во кои Македонија беше рамноправен ривал, па дури и победник.

Евентуален триумф на дански терен би значел вистинска сензација и еден од најголемите успеси во историјата на македонската репрезентација. Сепак, спортот безброј пати покажал дека фаворитската улога не гарантира победа, па и вечерашниот предизвик, иако исклучително тежок, не е невозможен.

Правдата на првиот натпревар на шампионатот ќе ја делат браќата близнаци Игор и Алексеј Ковалчиус од Молдавија.

2009 – Светско првенство – Данска – Македонија 32-24

2012 – Европско првенство – Данска – Македонија 33-32

2013 – Светско првенство – Данска – Македонија 33-30

2014 – Европско првенство – Данска – Македонија 29-21

2018 – Европско првенство – Македонија – Данска 20-31

2021 – Квалификации за Европско првенство – Македонија – Данска, 33-29

2021 – Квалификации за Европско првенство – Данска – Македонија 37-21

2022 – Европско првенство – Македонија – Данска 21-31