Во „војната“ во мак-фудбалот се вмеша и Новески: Време е за нови лица, лични битки и фрустрации не носат ништо добро!

Како да нема крај на реакциите во македонскиот фудбал, последен кој се огласи сега е Николче Новески.

Поранешниот дефанзивец кој сега исто така има улога во федерацијата реагираше по денешното ново обраќање на Игор Ангеловски.

Новески порача дека репрезентацијата и фудбалот треба да бидат над сите.

“Мислам дека е времe за нови лица и создавање на нови стручни кадри во фудбалот.

Секој треба да добие шанса, а времето ке покаже дали е оправдана довербата. Македонскиот фудбал и репрезентацијата не смеат да бидат заложници на поединец, особено не на човек кај кого личната суета и карактерот излегуваат во преден план.

Во ваков момент ни треба целосна поддршка за репрезентацијата, ангажираност и сплотеност од сите што ѝ мислат добро, а не обиди за самопромоција и поделби.

Репрезентацијата е над секое име и над секој поединечен интерес. Лични битки и фрустрации не ѝ носат ништо добро на Македонија”, порача поранешниот наш репрезентативец.