Тудор во проблеми: Јувентус без важен играч најмалку неколку месеци

Фудбалерот на Јувентус, Глејсон Бремер успешно оперираше колено, соопшти денес клубот од Торино.

Јувентус ќе мора да пронајде начин да ја “покрие” празнината поради тешката повреда на заменикот капитен кој ќе отсуствува подолго време од терените.

– Бремер утрово беше подложен на селективна артроскопска менисектомија на медијалниот менискус на левото колено. Операцијата во Лион беше целосно успешна. Играчот во наредните денови ќе започне со процесот на рехабилитација, со цел да се врати на натпреварувачка активност – стои во објавата на Јувентус без прецизирање за должината на паузата, но италијанските медиуми истакнуваат дека Бразилецот ќе се врати на терените на почетокот на 2026 година.

Повредата на Бремер (28) е тежок удар за тренерот на Јувентус Игор Тудор затоа што Бразилецот беше стандарден во почетната постава на “старата дама” оваа сезона.