Модриќ ја открива тајната на успехот: „Веројатно затоа сè уште сум на овој степен“

Лука Модриќ, по 13 сезони во Реал Мадрид, продолжува со извонредните игри и во дресот на Милан. Капитенот на Хрватска се обрати во интервју за CBS Sports каде зборуваше за својата мотивација и љубовта кон фудбалот, иако веќе има 40 години.

На прашање како ги задржува својата страст и мотивираност, Модриќ изјави:

„Тоа е чиста љубов кон фудбалот, навистина го обожавам. Од мал бев секогаш со топка. Токму таа љубов ми ја одржува мотивацијата. Кога победуваш, чувствуваш нешто посебно и сакаш повторно да го искусиш тоа. Тоа ме воздигнува, сè уште сакам да освојувам.“

Тој сподели и што смета дека е тајната на успехот:

„Не постои само една работа. Повеќе работи треба да се спојат, но најзначајна е љубовта кон играта и подготвеноста. Во фудбалот постојано мораш да се докажуваш, без разлика колку си постигнал. Не смееш да се задоволиш со минатите достигнувања. Веројатно затоа и сè уште играм на ова ниво.“

Во неговата кариера, Модриќ има играно за шест клубови – по Динамо и позајмиците во Зрињски и Интер Запрешиќ, тој премина во Тотенхем, помина 13 години во Реал Мадрид, а сега го носи дресот на Милан.