Буфон: Го направив истото што и Модриќ, Лука може да има одлична сезона

Лука Модриќ летово премина од Реал Мадрид во Милан и досега одигра 335 минути во лигата за својот нов тим. Колку брзо се прилагоди на новата средина покажува неговата почетна доминација во лигата, пофалбите од италијанските медиуми, но и зборовите на некои легенди на лигата. Меѓу нив е и Џанлуиџи Буфон, кој го најави неделното дерби меѓу водечкиот Наполи и третопласираниот Милан.

Тоа ќе биде натпревар што ќе се следи и низ призмата на она што можат да го направат Кевин Де Брујне, кој дојде во Наполи од Манчестер Сити, и Модриќ. Буфон не очекува многу голови, но очекува возбудлив натпревар.

„Тие се двајца шампиони. Особено ми е мило што Модриќ игра одлично бидејќи го познавам, а и јас во минатото направив ист избор, односно ја променив лигата на позрела возраст за повторно да најдам одреден поттик и енергија. Без оглед на приказните и скептицизмот на луѓето, се чувствував силно како пред пет години и го докажав тоа. Тој го прави истото, Модриќ со една средба неделно може да има одлична сезона.”