Аморим под притисок од британските медиуми – ќе го „преживее“ ли незгодниот период!?

Британската јавност уште не се опоравила од предвремената елиминација на Манчестер јунајтед од четвртолигашот Гримсби веќе во втората рунда на Лига купот, а веќе овој петок најрелевантните медиуми на Островот се занимаваат со статусот на Рубен Аморим, чие престојување на “Олд Трафорд” би можело да заврши уште за време на репрезентативната пауза во септември.

Во Јунајтед веќе немаат многу време за извлекување заклучоци по најголемиот дебакл што португалскиот тренер го доживеал за време на краткиот мандат во Јунајтед, бидејќи „црвените ѓаволи“ веќе во сабота го пречекуваат Барнли.

Каков и да е исходот на овој натпревар, јасно е дека е големо прашање дали Аморим ќе го дочека првото дерби на Манчестер оваа сезона, закажано за 14. септември, веднаш по паузата поради обврските на репрезентациите.

„Мирор“ пренесува дека веднаш по завршувањето на натпреварот против Барнли раководството на Јунајтед ќе има разговор со Аморим, а „Телеграф“ додава самокритичната нота кај Аморим по прашањето за идниот статус во клубот, што последователно би можело да го забрза разделувањето.

„Гардијан“ дава акцент на соблекувалната, истакнувајќи дека некои играчи се посомневале во авторитетот и капацитетот на Аморим да најде решение од првата посериозна криза од почетокот на сезоната.

Фото: Принтскрин