Трансфер сензација: Коман го менува Баерн со Ал Наср кај Кристијано Роналдо

Францускиот репрезентативец Кингсли Коман наскоро ќе биде нов играч на Ал Наср. Клубот од Ријад, каде што главната ѕвезда е Кристијано Роналдо, постигна договор со Баерн Минхен, а очекувањата се дека трансферот ќе биде официјализиран во следните денови.

По засилувањата со Жоао Феликс и Иниго Мартинез, Ал Наср продолжува со амбициозни трансфери – а Коман е несомнено едно од најгласните имиња досега.

Коман, кој постигна победнички гол во финалето на Лигата на шампионите во 2020 година против ПСЖ и ја донесе последната европска титула на Баерн, сега одлучи да ја продолжи кариерата во Саудиска Арабија.

Вредноста на трансферот се проценува на околу 30 милиони евра, што е уште еден показател за тоа колку Ал Наср е подготвен да инвестира во квалитетни играчи.

И покрај бројните повреди во неговата кариера, Коман се уште има способност да направи разлика на теренот. Во минатата сезона забележа 45 настапи, постигнувајќи девет голови и шест асистенции.