Боксер почина откако колабираше во рингот

Нигерискиот боксер Оланреваџу Сегун почина за време на борбата. Доживеа колапс во рингот, а неговиот живот, и покрај брзата реакција на медицинскиот тим, за жал не беше спасен.

За време на борбата со борецот од Гана, Џон Мбанугом, Сегун ненадејно ја загуби свеста во третата рунда, иако според бодовното оценување на судиите имаше предност.

Иако беше брзо пренесен во Универзитетската болница Корле-Бу во Акра, лекарите го прогласија за мртов откако неуспешно се обидоа да го оживеат младиот човек.

Иако официјалната причина за смртта не е потврдена, се шпекулира дека станува збор за акутен срцев застој.

Боксерските заедници од Нигерија, Гана, Африка и целиот свет се обединети во жалоста поради трагичниот настан, кој е уште еден во низата сè почести примери на губење на млади животи на спортисти и боксери. Противникот на Сегун изрази искрено сочувство до семејството и саканите на починатиот.