Спортинг експресно го отпушти наследникот на Аморим!

Жоао Переира повеќе не е тренер на фудбалерите на Спортинг, објави утрово клубот од Лисабон.

Спортинг на социјалните мрежи објави дека ја раскинал соработката со Переира, кој имаше договор со клубот од Лисабон до јуни 2027 година.

Переира беше именуван за шеф на стручниот штаб на Спортинг на 11 ноември, а претходно беше тренер на резервниот тим на лисабонскиот клуб. Тој го замени Рубен Аморим на позицијата тренер на Спортинг, кој презеде Манчестер јунајтед.

Переира го водеше Спортинг на осум натпревари во сите натпреварувања и забележа три победи, едно нерешено и четири порази.

Клубот од Лисабон се наоѓа на второ место на табелата на португалското првенство со 37 бодови.

Португалските медиуми наведуваат дека новиот тренер на Спортинг би требало да биде Руй Боржес, кој во моментов е шеф на стручниот штаб на Виторија Гимараеш.