Лапорта го губи трпението: Двајцата капитени добиле ултиматум – потпис или трансфер листа!

Претседателот на Барселона, Жоан Лапорта, постави јасен ултиматум до двајцата капитени, Роналд Араухо и Френки де Јонг.

Како што откри доверливиот Релево, управата на Барселона не сака да дозволи двајца клучни играчи да заминат со попуст.

Араухо и де Јонг се важни членови на тимот, но поради хронични повреди практично поголем дел од 2024 година го поминаа надвор од строј.

И Уругваецот и Холанѓанецот имаат договори до јуни 2026 година и се исклучително вредни на пазарот, така што Барселона не може да си дозволи да биде во лоша преговарачка позиција, како што би била ако наскоро не ги обноват договорите.

Релево тврди дека Лапорта сака да ги задржи двајцата, но само под услов да потпишат на време и да ги прифатат условите на клубот. Најголем оптимизам постои околу потписот на Араухо, кој никогаш не ја криел својата приврзаност кон Барселона, исто како кога во 2022 година потпиша нов договор иако имаше многу попрофитабилни понуди од Премиер лигата.

Уругваецот сега се враќа на теренот по шестмесечна пауза, ќе се бори за место во тимот со Пау Кубарси и Иниго Мартинез, но на лето ќе биде на трансфер листа ако не потпише нов договор.

Што се однесува до де Јонг, тој се врати на теренот во октомври, но далеку од тоа дека е во добра форма. Холанѓанецот никако не може да го најде вистинскиот ритам, а поради многу грешки често е на удар на навивачите.

Тој неколку месеци не одговори на понудата на клубот да потпише нов договор, убедливо е најплатен во екипата и се шпекулира дека е подготвен да остане до истекот на истиот. Доколку на лето не потпише нов договор и одбие продажба, некои пишуваат дека Лапорта ќе нареди да биде отстранет од екипата.

Сѐ на сѐ, спортскиот директор Деко очекува голема работа и важни потписи од двајцата капитени. Изгледа дека многу полесно ќе оди со Араухо, додека де Јонг, како и години наназад, е многу потежок за соработка поради лошиот однос со управата.