Црно сценарио за Гвардиола: Манчестер сити го чека тежок предизвик – може да остане без ЛШ

Манчестер Сити продолжува да тоне и сега веќе никој не се плаши да ги нападне и да се обиде да ги победи.

Тоа му успеа на Јувентус, кој исто така е во криза, но славеше со резултат 2:0. Сити така го запиша и третиот натпревар без победа во Лигата на шампионите, и верувале или не, тимот на Пеп има само една победа во последните 10 натпревари! 

Сити е моментално на 22. позиција на табелата на Лигата на шампионите, две кола пред крајот, но објективно и со осум бодови, не би требало да се плаши за местото во плеј-офот.

Меѓутоа, поради тоа што во следното коло гостува на Пари Сен Жермен, кој има бод помалку и исто така е под притисок, ако Сити загуби сигурно ќе биде надвор од местото што води во следната фаза од ЛШ пред последното коло! 

Сити во последното коло го пречекува Клуб Бриж и извесно е дека со победа и 11 освоени бодови сигурно ќе обезбеди место во плеј-офот.

Меѓутоа, притисокот во случај на пораз во Париз и местото надвор од плеј-офот пред последното коло би бил најголем и најшокантен во ерата на Пеп Гвардиола. Засега статистичарите велат дека девет бодови нема да бидат доволни за плеј-офот, што значи дека Сити мора да победи или против ПСЖ или против Клуб Бриж.