Teнзии во Париз, Мбапе се налути, Енрике му одговори: Ќе беше глупаво да примиме гол

Ѕвездата на Пари Сен Жермен, Килијан Мбапе не беше премногу расположен по ремито на неговиот тим со Борусија Дортмунд (1:1).

ПСЖ се пласираше во осминафиналето, но само затоа што Њукасл не победи против Милан. Француските медиуми пишуваат дека Мбапе најмногу незадоволен бил од насоките на тренерот Луис Енрике да ја држат топката во последните минути без да ризикуваат да нападнат.

Таа одлука Енрике ја донел откако Милан постигнал гол за водство против Њукасл. На ПСЖ од тој натпревар му одговараше се освен победа на Њукасл кој ако славеше ќе играше осминафинале во ЛШ.

По натпреварот Енрике беше запрашан да каже нешто на оваа тема.

„Зошто Мбапе реагираше така? Нормално е фудбалерите да се вознемирени бидејќи имавме пет одлични прилики и не постигнавме гол. Фудбалерот може да биде лут затоа што сака да постигнува голови, но јас сум тој што треба да процени кога треба да се ризикува.

Ќе беше глупаво да примивме гол во 85. минута и така да бидеме елиминирани. Претходно воопшто не следев што се случуваше на натпреварот Њукасл – Милан, но кога Милан постигна гол се сменија работите“, изјави Енрике.