Кариус првпат брани во Лигата на шампионите по натпреварот кој му ја уништи кариерата?

Њукасл вечерва ќе се обиде да се пласира во осминафиналето во Лигата на шампионите.

За тоа му треба домашна победа против Милан, а воедно мора да навива Пари Сен Жермен да не ги освои сите три бода на гостувањето кај Борусија Дортмунд.

Тренерот на Њукасл, Еди Хау, во пресрет на клучниот натпревар се најде во големи проблеми на голманската позиција.

Неодамна тешко се повреди првиот голман Ник Поуп кој ќе отсуствува неколку месеци, а ден пред натпреварот не тренираше ниту неговата замена Мартин Дубравка.

Хау на прес-конференцијата изјави дека не е сигурен дека Дубравка ќе биде подготвен да застане меѓу головите против Милан.

Така, третиот голман на Њукасл, Лорис Кариус треба да биде во стартниот состав. Тоа би било прв настап на Кариус во Лигата на шампионите по финалето во 2018 година, кога бранеше за Ливерпул против Реал Мадрид и беше директно одговорен за два гола во поразот од 3:1.

Кариус не беше истиот по тој страшен настап, а во септември минатата година дојде во Њукасл да го пополни местото трет голман.

За овој англиски клуб досега бранеше само еднаш и тоа во финалето на Лига купот минатата сезона бидејќи Поуп и Дубравка немаа право на настап.