Иконата на Баерн најави голем трансфер: го посакуваат Барселона, Реал Мадрид и Баерн

Поранешниот француски репрезентативец и играч на Баерн Минхен, Вили Сањол денеска е селектор на Грузија, каде има можност да го тренира 22-годишниот Кварацхелија, крилниот напаѓач на Наполи и еден од највозбудливите офанзивци на денешницата, кој е веќе жива легенда во својот клуб.

Минатата сезона беше како сон за Кварацхелија. Во својата прва сезона во Наполи, тој беше најдобриот играч на тимот што му ја донесе долгоочекуваната шампионска титула.

Станува ли тоа најголемиот трансфер во историјата на клубот?
По една сезона со 14 гола и дури 17 асистенции на 43 настапи, голем број европски гиганти беа заинтересирани за Кварацхелија, но Наполи брзо реагираше и му ја зголеми платата во неговиот договор, кој е до 2027 година, за да го задржи Грузиецот барем уште некое време.

Сепак, Сањол мисли дека нема долго да биде во Италија: „Кварацхелија игра во врвен клуб, но светските гиганти како Барселона, Реал Мадрид и Баерн сега се заинтересирани за него. Играњето за тие клубови е сон за секој фудбалер. Сите играчи се надеваат дека еден ден ќе облечат таков дрес и ќе освојат важни трофеи“.

Според Трансфермаркт, вредноста на Кварацхелија моментално е 90 милиони евра, но поради должината на неговиот договор и неговата важност за клубот, реално е да се очекува дека евентуалниот купувач ќе мора да плати отштета од над 100 милиони евра на Наполи. Засега најскапиот трансфер во заминување на Наполи е продажбата на Гонзало Игуаин во Јувентус за 90 милиони евра.