УЕФА почна да го „тресе“ ПСЖ после жалбата од Реал

УЕФА веќе се активираше и почна да ги проверува информациите за можни неправилности во Пари Сен Жермен во врска со правилата за финансиски фер-плеј.

Реал Мадрид вчера реагираше до европската централа со тврдење дека францускиот гигант на различни начини се обидува да ги заобиколи правилата.

Според новинарот Етјен Моати од Комитетот за финансиска контрола на УЕФА, тие побарале од „светците“ да им достават одредени информации поврзани со сметките на клубот. Откако ќе се достави и прегледа предметната документација, ќе се оценува дали има докази за прекршоци, што пак би довело до поведување кривична постапка.

За сезоната 2020/21, ПСЖ објави загуби од 224,3 милиони евра, но во исто време покажа неограничени финансиски можности откако потпиша со скапи ѕвезди како Лионел Меси, Серхио Рамос, Џанлуиџи Донарума и други, а неодамна Килијан Мбапе го направи најплатен фудбалер во светот.

Во 2014 година Французите имаа финансиски проблеми и потпишаа посебен договор со УЕФА со која се согласија да платат казна од 60 милиони евра.