Алегри: Фаворити сме, но оваа сезона 5 тима ќе се борат за Скудето!

Тренерот на Јувентус, Макс Алегри верува дека оваа сезона во Серија А повеќе тимови ќе се борат за Скудето, за разлика од претходните сезони кога „старата дама“ беше неприкосновена.

Серија А ќе биде отворена утре со натпреварот Јувентус – Каљари, а Алегри иако признава дека неговиот тим ќе биде фаворит, тврди дека ќе биде многу тешко да ја одбрни титулата.

„Ако бидеме фокусирани и од првиот ден почнеме со правилен пристап, тогаш сме фаворити. Сепак, мислам дека оваа сезона првенството ќе биде многу понеизвесно и за титулата ќе се борат пет екипи“, истакна Алегри.

„Кога шест години со ред ја освојувате титулата и притоа добро играте во Европа, тешко може да напредувате. Противниците се засилуваат и нема место за грешки. Важно е добро да ја започнеме сезоната бидејќи во последните 6 кола ќе имаме судир со директните ривали“, заклучи тренерот на „бјанконерите“.