ЕУРО анализа: Англија – Данска, двете селекции сакаат продолжување на сонот

Стадионот Вембли е домаќин и на второто полуфинале од Европското фудбалско првенство. Вечерва Англија го пречекува скандинавското изненадување Данска во Лондон, каде ќе се бие битка за место во финалето и дуел против Италија.

Голема шанса за Англија

Англија на Герет Саутгејт ја инспирираше нацијата. Дваесет и пет години од неговото промашување пенал за ЕУРО 1996 против Германија, тој дочека одмазда. Прво славеше во осминафиналето токму над Германија со 2:0, за во минатата рунда да ја декласира Украина со неверојатни 4:0.

Откако го поминаа својот најтежок тест против Германија, Англија на лесен начин се справи со украинска селекција, иако дури и најжестоките приврзаници не можеа да ја предвидат доминацијата на англичаните.

Хари Кејн конечно се разига и со два гола беше најзаслужен за триумфот. Хари Мегваер и Хендерсон само допринесуа за дебакл на Украина. Сепак, работата на англичаните е далеку од завршена, а Саутгејт тоа го знае подобро од кој било.

Откако помина седум натпревари низ сите натпреварувања без да прими гол, прв настап во финале на едно ЕУРО ќе биде историја. Доколку нивната цврста одбрана издржи и на овој меч со Данска, тоа ќе биде рекорд бидејќи ниту една репрезентација било на Светско првенство или на Европско, не завршила без примен гол.

Мора да се признае дека Англија имаше најлесен пат до тука, има релативно погоден противник и во ова полуфинале, а само еден меч не го ифграа на домашен терен. Тоа секако е голема предност за селекцијата, но во исто време и шанса која никако не смеат да ја пропуштат.

Данска продолжува да сонува

Она што започна како хорор, стана материјал за исполнување на соништата за Данска, која продолжува да го прави горд Кристијан Ериксен. Може само да се замисли насмевката на лицето на плејмејкерот на Интер, кој е сведок на неговиот тим како се обидува да направи историја, иако јасно е дека неговите соиграчи очајно би сакале тој сепак да биде на теренот со нив.

Како и да е, избраниците на Каспер Хјулманд се справија далеку подобро отколку што некој можеше да замисли откако беа сведоци на вознемирувачките сцени на првиот меч. Стартуваа со два порази, но во секој меч ја подигнуваа формата и сосема заслужено се најдоа меѓу најдобрите четири. Победа над Русија со 4:1, па елиминација на Велс со 4:0, за во минатата рунда да слават и над Чешка со 2:1.

Се разбира, последниот пат кога Данска успеа да стигне до сега, тоа кулминираше со бајка која заврши со трофеј на ЕУРО 1992 – нивниот прв и единствен триумф на континенталните шампионати досега.

Сега се аутсајдери, но никој не може да им го одзеде правото да се надеваат на уште еден успех и пласман во големото финале.