Реал му плати да се врати дома: Заминува и Коентрао!

Реал Мадрид полека се разделува од своите староседелци. Пепе како слободен играч оди во ПСЖ, а неговиот земјак Фабио Коентрао се сели во Спортинг Лисабон. После шест години во дресот на „Кралевите“, Коентрао дефинитивно заминува од Реал. Иако делува како ветеран, има 29 години и сигурно може да одигра уште некоја квалитетна сезона.

Дојде како големо засилување од Бенфика во 2011 година за 30 милиони евра, на инсистирање на Жозе Мурињо, а заминува како небитен резервист кој претходната сезона одигра само шест натпревари во сите натпреварувања вкупно. Една сезона претходно помина на позајмица во Монако каде тешко се повреди. Во текот на пет сезони во Реал, не успеа да го победи конкурентот Марсело. Само во една сезона кај Мурињо беше постандарден на теренот од Бразилецот, а кај сите останати тренери главно беше резерва за Марсело.

 Спортинг прв се заинтересира за Коентрао. Секако, клучен човек е тренерот Жорж Жесус, кој и го лансираше во Бенфика. Сега Коентрао, ќе ги разбранува фудбалските страсти во Лисабон и ќе премине во таборот на најголемиот ривал.

Со оглед на тоа дека има уште една година договор со Реал и гарантирани 3,5 милиони евра кои Спортинг не може да му ги плати, се очекуваше дека Реал ќе направи некои финансиски отстапки и ќе му плати на Португалецот само да си оди. Спортинг се согласи да му плаќа на Фабио 1 милион евра годишно, додека Реал ќе му исплати 2 милиони како обештетување, наместо оние 3,5 милиони. На крајот, играчот се согласи да се откаже од тие 500.000 евра за сета таа сага што побрзо да се заврши и да премине во Спортинг.

Формално, транферот би требало да биде официјализиран како едногодишна позајмица до крајот на сезоната, кога Коентрао ќе стане слободен играч и ќе може да потпише нов договор со Спортинг или со некој друг заинтересиран клуб.

На негово место во Реал доаѓа Тео Ернандез, кого „Кралевите“ го откупија од градскиот ривал Атлетико, бидеќи Французинот одигра феноменална сезона на позајмица во Алавес.