Ванда како едвај да чекаше да се огласи – го обвини Спалети!

Аргентинскиот напаѓач Мауро Икарди повторно се наоѓа во центарот на вниманието откако не конкурираше за натпреварот помеѓу Интер и Лацио иако започна со тренинзи.

Икарди во претходните денови започна да тренира со екипата, но во петокот како што кажа самиот Спалети нешто се случило на тренингот и стратегот на Интер одлучил Икарди и оваа средба да биде на трибините.

Се шпекулира дека тоа „нешто“ било одбивањето на Икарди да им се извини на соиграчите во соблекувалната.

„На некој начин изгледаше како во тимот да ни дошол нов играч. Не беше долго време со нас. Тренираше и моравме да го вклучуваме во режимот на тренинг. Вчера нешто се случи и морав да проценам и да донесам одлука. Ќе видиме како ќе биде за наредните натпревари“, гласеше изјавата на Спалети во саботата.

Интер вчера загуби со 0:1, а домаќините играа без вистински напаѓач затоа што надвор од тимот беше и Лаутаро Мартинез кој е повреден. Меѓутоа и покрај тоа што Спалети немаше напаѓачи одлучи Икарди да не игра против Лацио.

Меѓутоа на одговор од Ванда не се чекаше долго, како и вообичаено сопругата на Икарди која многумина ја сметаат за виновник за се што се случува се огласи и го обвини Спалети.

„Мауро е спремен да игра и сега се е до тренерот. Мауро ништо не кажал за оваа ситуација и не ја знаеме неговата верзија. Приказната на Спалети можеби и не е точна. Мауро само чека да игра и тоа е се. Спремен е да игра и да помогне на тимот, но очигледно дека мора јавно да каже за тоа да се случи“, изјави Ванда.