„Мерсисајд“ дерби: Ливерпул треба да биде газда во својот град, ако сака да биде газда во Англија

Дуелот Евертон – Ливерпул е еден од најголемите и најстарите дербија во Англија. Битката за Ливерпул секогаш нуди интересни, неизвесни средби со многу борба, како на теренот, така и на трибините. Така ќе биде и овој пат, без разлика што Ливерпул има многу подобар, поквалитетен тим од гратскиот ривал.

Евертон од 2010 година нема победа во Мерсисајд дербито

Евертон е елиминиран од ФА Купот и се наоѓа на деветтото место на табелата во Премиер Лигата. Според тоа, може да се претпостави дека сезоната за нив на некој начин е веќе завршена. Тие речиси и да немаат шанси за излез во Европа. Освен, се разбира, фактот дека тие би можеле сериозно да ги намалат надежите на своите лути ривали Ливерпул, за освојување на титулата.

Но Евертон во Мерсисајд дербијата е катастрофален во последните неколку години. Тие не славеа на ниту еден дерби дуел против Ливерпул на последните 18 меѓусебни средби. Или подобро кажано, немаат победа над гратскиот ривал од далечната 2010 година. На првиот меѓусебен дуел оваа сезона, тие играа добро во текот на мечот, но беа поразени на бизарен начин. Ориги постигна гол на тој дуел во 96-та минута од средбата.

По трите порази во серија, Евертон во средината на неделата конечно славеше победа и тоа со 0:3 во Велс кај Кардиф. Гилфи Сигурдсон постигна два гола, на тој меч па Марко Силва нема да направи премногу промени и се надева дека таа успешна формула ќе може да донесе уште еден добар резултат.

Марко Силва нема да менува премногу

Пикфорд ќе биде на голот, а во одбраната најверојатно ќе го видиме Курт Зума, кој ќе се врати во тимот по суспензија. Тој ќе биде единствена промена во одбраната од минатиот меч и ќе игра заедно со Мајкл Кин ( Фил Јагиелка премногу се истроши против Кардиф ). Евертон има голем квалитет на страничните позиции во одбраната, а Лукас Дине е еден од најдобрите леви бекови во лигата оваа сезона. Сеамус Колеман полека ја враќа својата форма по повредата на повредите, а тој му асистираше на Сигердсон против Кардиф.

Во средниот ред, Андре Гомес  се надева дека ќе се врати на местото на Морган Шнејдерлин, заедно со Идриса Гуеје. Има шанса Силва да да ја зацврсти својата централна средина од средниот ред со користење на три конвенционални играчи, но ова сепак останува алтернативен систем.

Покрај тоа, Силва не сака да го премести Сигурдсон од неговата позиција по неговиот одличен настап против Кардиф. Доколку го повлече подефанзивно, тој нема да може да ги искаже своите квалитети н анајдобар начин. Тео Волкот и Ричарлисон се првите избори на крилата, но има добри шанси Бернард да стартува поради свежината која е на негова страна. Ова би можело да значи дека еден од двете крила кои стартуваа против Кардиф ќе започне на клупата, но Ричарлисон може да игра и како шпиц. Доминик Калверт-Левин постигнал гол против Кардиф, но сега неговиот настап зависи од можната ротација на крилата и дали Ричарлисон ќе игра како крили или како напаѓач.

Изборот на Клоп зависи од враќањето на Фирмино

Јирген Клоп, исто така има прашалници околу почетниот тим, а Роберто Фирмино веројатно ќе се врати меѓу првите 11. Сепак, откако тој ја пропушти победата над Вотфорд од 5:0 поради повреда, нема гаранција дека ќе биде способен да започне, што би претставувало проблем за Клоп. Прашање е дали тој ќе продолжи со Ориги, кој постигна гол во средината на неделата, или ќе го премести Мохамед Салах како централен напаѓач? Се чини дека поверојатно е Салах да игра на десната страна, каде што ќе проба да го искористи секој простор што ќе го остави зад себе офанзивниот Дигне.

Вистинската ѕвезда во последниве недели сепак е Садио Мане. Иако одигра просечен натпревар против Манчестер Јунајтед, Мане одигра одличен меч против Ватфорд постигнувајќи два гола. На овој меч, неговите спринтови зад одбраната на Евертон би можеле да бидат клучни.

Робертсон и Арнолд се во врвна форма

Има шанса Клоп да се сврти повторно кон Џердан Шаќири доколку Фирмино сеуште е надвор од стројот. Може да настапи и со 4-2-3-1 формација, но во последниве неколку недели неговиот избор е 4-3-3. Фабињо е во добра форма, Георгинио Вијанлум нуди многу енергија и флексибилност во средината, а Хендерсон може да биде најпогоден избор за средниот ред овдена овој меч покрај нив двајца. Наби Кеита и Џејмс Милнер се другите опции.

Ливерпул во победата над Ватфорд беше многу зависен од двајцата бекови по страничните позиции. Тие помогнаа во постигнувањето на сите пет гола. Ендру Робертсон беше асистент на три гола, а извонредниот Трент Александар-Арнолд асистираше на два гола.

Тие повторно ќе пробиваат во офанзива, а одбранбената дисциплина на крилата на Евертон ќе биде силно тестирана. Џоел Матип игра добро заедно со Вирџил ван Дијк, а Ливерпул на последните четири натпревари не прими гол. Еден од најзаслужните за тоа, секако е и Алисон на голот.