Челзи го губи компасот: 50 милиони евра, плус „џокерот“ за Един Џеко и бекот од Рим!

Менаџерот на Антонио Конте е во потрага по напаѓач и лев бек.

Фановите на Челзи веројатно се и по малку загрижени за трансфер политиката која ја води актуелниот шампион. „Сините“ во последно време се распрашуваа за Енди Керол, а потоа следуваше и интерес за Питер Крауч, тука беше јасно дека „сините“ го изгубија компасот…Додека тоа што Конте не успева да го доведе Фернандо Љоренте е друга работа.

Сега Италијанецот ќе се обиде да реши два проблема со еден потег.

Имено како што пренесуваат италијанските медиуми, Челзи ќе се обиде да ги доведе Един Џеко и Емерсон Палмери од Рома.

Последните денови во медиумите на Чизмата и Островот пишуваа за интересот за Емерсон, а во текот на вчерашниот ден се појави информација дека клубот веќе ја спремил понудата.

Секогаш добро известениот италијански новинар на „Скај“ Џанлука Ди Марцио пренесува дека Челзи е спремен да испрати 50 милиони евра, плус Мичу Батшуаи за во пакет да ги добие Един Џеко и Емерсон.

Тренерот на Рома, Еузебио Ди Франческо како и спортскиот директор Мончи до овој момент не сакаа да слушнат за продажба на Џеко, но останува да се види како ќе реагира клубот по оваа понуда.