Де Лаурентис одлучил: Хрват наскоро ќе биде нов тренер на Елмас?

Хрватскиот стратег Игор Тудор наскоро би требало да стане нов тренер на Наполи, пренесуваат италијанските медиуми.

По киксот на Наполи против Унион Берлин на домашен терен и поразот пред своите навивачи во првенството од Емполи, Руди Гарсија е пред отказ. Се уште нема официјална потврда, меѓутоа медиумите во Италија тврдат дека Де Лаурентис ја донел одлуката.

Исто така следи репрезентативна пауза, па новиот тренер би имал нешто повеќе време до следниот натпревар на Наполи, па затоа се смета дека ова е моментот кога ќе дојде до промена на клупата.

Смената на клупата на Наполи можеби ќе биде добра работа и за македонскиот репрезентативец, Елиф Елмас кој под водство на Гарсија добиваше уште помалку минутажа од минатата година кај Спалети.

За Тудор од друга страна ова би било враќање во Серија А каде што како играч помина голем дел од кариерата во Јувентус, а потоа во клубот од Торино беше и помошник. Самостојно ги водеше Удинезе и Верона. Последниот ангажман го имаше во Марсеј минатата сезона.