ФК Тетекс доби нов претседател и ново раководство!

Во ФК Тетекс кој минуваше низ тешки денови денес се најавуваа подобра иднина откако за нов претседател беше избран Бобан Вучевски.

Новиот претседател се обрати на присутните и вети подобри денови, а претставен и беше новиот управен одбор.

Почитувани претставници на медиумите, почитувани присутни, почитувани гости.

Најпрво сакам да Ви се заблагодарам за вашето присуство на денешната прес конференција.

Голема е честа да зборувам пред сите вас, но уште поголема е честа што токму јас сум избран да бидам Претседател на управниот одбор на нашиот клуб ФК ТЕТЕКС Тетово.

Упатувам голема благодарност и на верните навивачи што ме предложија во овие тешки моменти, да помогнам за повторно обединување и функционирање на клубот.

Како што Ви е познато на повеќето од вас, па и на јавноста, клубот го наследуваме во лоша состојба, без соодветен кадар на фудбалери, соодветен стручен штаб, минусно салдо и долгови.

Затоа, нашата цел ќе биде да се обединиме, сите верни фанови, тетовчани, љубители на фудбалот и спортот со заеднички сили да го вратиме клубот онаму каде што припаѓа.

Ветуваме дека со сите сили ќе се бориме и секој натпревар во втората полусезона ќе го играме како да ни е финале. Значаен ќе биде секој гол, секој бод, секоја победа за наш опстанок и спас на клубот.

Воедно, испраќаме апел до сите заинтересирани, од различна професија ( поранешни и сегашни фудбалери, легенди, спортски доктори, тренери и сите останати ) кои можат да дадат некаков придонес во клубот, да се пријават.

Дел од нашата мисија во наредниот период ќе биде и посета на регионални компании за да побараме парична помош и финансиски да закрепнеме, за да не дозволиме згаснување на овој бренд кој функционира речиси 70 години.

Отворени сме за секој кој што смета дека може да помогне, и го повикуваме да се приклучи кон оваа иницијатива, затоа што само сите заедно, сплотени, верувам дека можеме многу повеќе да допринесеме са клубот и да успееме во нашиот план. Да донесеме големи резултати и да го вратиме ФК ТЕТЕКС на старите победнички патеки и славни времиња.

Со особена чест и задоволство, дозволете ми да Ви ги претставам и останатите членови на Управниот одбор:

1. Бобан Вучевски

2. Ивица Хаџииљоски – Чајка

3. Драгољуб Јовановски

4. Перо Јовановски

5. Живко Антовски

6. Бобан Мишевски

7. Ненад Спасоски – Зец

Ова е тим составен од искрени, добронамерни и угледни луѓе кои со срце го сакаат Тетекс и се подготвени да одговорат на сите предизвиците кои ни следуваат во наредниот период.

На крајот на оваа прес конференција, искрено посакувам среќна и успешна работа на новиот управен одбор.