Турски фудбалер одби да носи маичка со порака за запирање на војната, па објасни зошто

Tурскиот фудбалер, Ајкут Демир се најде во центарот на вниманието откако одби да ја носи маичката „Запрете ја војната“ пред натпреварот на Ерзурумспор и Анкарагучи.

Фудбалерот на домаќините се појави во дрес додека сите други носеа маичка со споменатиот натпис. Натписот се однесува за нападот на Русија врз Украина, а Демир објасни зошто не сакал да ја носи таквата маичка.

„Секојдневно илјаници луѓе гинат на Блискиот исток. За тоа сите молчат и игнорираат, така е затоа што не се случува во Европа. Не ми беше пријатно да носам таква маичка затоа што не носиме и за земјите кои со години се во војна. Јас сум против сите војни во светот, не сакам да страдаат невини луѓе“, изјави Демир.