Тежок удар за Бразил: Нејмар нема да биде спремен за Копа Америка

Ѕвездата на бразилската репрезентација и напаѓач на Ал Хилал, Нејмар, нема да биде подготвен Копа Америка која се игра во летото кое следи.

Познато е дека Нејмар ги повреди вкрстените лигаменти и менискусот и новата проценка е дека нема да се врати на терените пред август.

Нејмар се повреди во октомври на натпреварот против Уругвај, а во ноември беше опериран на левото колено.

Веста дека Нејмар нема да се опорави пред Копа Америка ја потврди лекарот на бразилската репрезентација Родриго Ласмар кој ја изврши операцијата.

„Нема да има време, Копа Америка доаѓа прерано. Нема смисла да се прескокнуваат чекорите во процесот на опоравување, тоа само би го зголемило непотребниот ризик. Очекуваме тој да биде подготвен за почетокот на сезоната во лигата во 2024 година. Мораме да бидеме трпеливи. Да зборуваме за враќање пред девет месеци е рано“, изјави Ласмар.

Нејмар е водечки стрелец на националниот тим со 79 гола на 129 натпревари. Копа Америка е закажана од 20 јуни до 14 јули.