Сити сака да ја комплетира колекцијата трофеи, но Интер e најопасен кога е аутсајдер

Денес е денот кога фудбалска Европа ќе го добие новиот шампион, па сите очи ќе бидат вперени во Истанбул, каде силите ќе ги одмерат Манчестер Сити и Интер.

Ова за Манчестер Сити ќе биде шанса да ги комплетира сите трофеи и да одигра историска сезона. Од друга страна Интер сака да покаже дека историјата на клубот има голема улога и не е случајно во ова финале, иако никој тоа не го предвидуваше. Интересно е што ова е прв официјален натпревар на Манчестер Сити и Интер воопшто.

Манчестер Сити на чекор од историја

Манчестер Сити имаше многу турбулентна сезона која може да биде историска и да се заврши со тројна круна. Иако тимот на Гвардиола беше фаворит од самиот старт во сите натпреварувања, сепак не робите не се одвиваа баш најдобро од стартот. Во еден момент битката за Премиер лигата изгледаше како загубена, но упорните „граѓани“ сепак стигнаа до титулата. Во Лигата на шампиони пак Сити беше доминантен од самиот старт. Во групната фаза буквално се прошета, а на патот до финалето елиминира два големи фаворити – Баерн Минхен и Реал Мадрид и тоа на супериорен начин. Поради тоа многумина мислат дека токму ова е таа сезона кога Сити ќе се искачи на кровот на Европа, иако изминатите сезони беше многу блиску. Оваа сезона Гвардиола го има Халанд, најдобриот стрелец во Европа, а тоа е „оружје“ кое му недостасуваше на тимот изминатите години. Иако е голем фаворот, сепак Сити треба да биде претпазлив бидејќи италијанските клубови знаат дека финалињата не се играат туку се победуваат, а знаат како се прави тоа. Сити влегува во овој дуел во одлична форма и загуби само еден натпревар од почетокот на февруари, па атмосферата во тимот е одлична.

Интер најголемо изненадување сезонава

Интер е најголемо изненадување оваа сезона во Лигата на шампиони. Никој не предвидуваше ваков успех на „нероаѕурите“, па и самиот Инзаги призна дека целта била да се помине групната фаза. Интер беше во исклучително тешка група заедно со Баерн Минхен и Барселона, па предвидувањата беа дека уште тука ќе ја заврши својата авантура. Сепак, миланскиот гигант успеа да ја мине групата и заслужено стигна до финалето. Иако мора да се признае дека Интер имаше лесен пат до полуфиналето и ги елиминира Порто и Бенфика. Во полуфиналето против градскиот ривал Милан покажа квалитет и некако во вистинско време влезе во одлична форма. Неодамна го освои и трофејот вп Купот, па атмосферата во тимот е одлична. Иако „нероаѕурите“ влегуваат како аутсајдери во финалето, сепак нема лесно да се предадат, а Инзаги призна дека има „рецепт“ како да го победи Сити. Финалињата готово секогаш се играат на „италијански ничин“, а Интер тоа одлично го знае. Тимот има одлична одбрана, а напред напаѓачи кои можат да бидат закана во секој момент. Инзаги е тренер кој знае да игра Куп натпреварувања и до сега не загубил во финале, а добра вест е што Скриниар се опорави од повредата и ќе биде на располагање.

Можни состави:

Манчестер Сити: Едерсон, Аканжи, Дијаз, Стоунс, Вокер, Грилиш, Родри, Гундоган, Де Брујне, Бернардо Силва, Халанд.

Интер: Онана, Дамфрис, Дармијан, Ачерби, Бастони, Ди Марко, Брозовиќ, Чалханоглу, Барела, Џеко, Лаутаро Мартинез.

Очекување

Финалињата се секогаш непредвидливи и ги одлучуваат детали. Сити е голем фаворит, но Интер сигурно нема лесно да се предаде. Очекуваме возбудлив меч и голови на двете страни.