Роналдињо ги крие парите од банките во Бразил, судот му го одзема пасошот

Легендарниот бразилски фудбалер, Роналдињо поминува низ навистина турбулентен животен период.

Шпанската „Марка“ пишува дека бразилскиот суд издал наредба да се одземе пасошот на Роналдињо поради неплатени долгови во износ од два милиони евра.

Роналдињо и неговиот брат биле казнети поради илегално градење на забрането подрачје, но запленувањето на нивниот имот не било доволно за да подмират долговите кои во текот на четиригодишниот судски процес се зголемиле поради каматата.

Интересно е што во обидот на банките да го наплатат долгот на Роналдињо на неговата сметка се пронајдени само шест евра.

Пасошот на Роналдињо му е привремено одземен, а се очекува долговите да бидат подмирени откако „Најк“ ќе му уплати голема сума на пари која Бразилецот ќе ја заработи од продажбата на патики на овој бренд со неговото име.

Легендарниот фудбалер на 17-ти ноември треба да настапи во ревијален натпревар во Франкфурт, а останува да се види како ќе го изведе тоа без пасош.