Проблем за Вардар: Анте Гаџа надвор од терените до крај на 2022 година!

Вардар неодамна го освои Купот на Македонија, а црвено-црните се и пред нова титула во првенството, меѓутоа сега Вардар се соочува со проблем за следната сезона.

Хрватот Анте Гаџа го повреди коленото во настапот за Хрватска во квалификациите за Европското првенство против Словачка, а сега после направените лекарски прегледи беше објавено дека Гаџа се здобил со една од најтешките повреди за секој спортист.

Настрадале предните вкрстени лигаменти и Гаџа го очекува најмалку шест месеци реахабилитација, а тоа значи дека нема да му биде на располагање на Вардар скоро цела прва полусезона од следното првенство.

Ќе потсетиме, Гаџа во март го продолжи договорот со Вардар што е само потврда дека тој е важен ракометар за составот од Скопје и ова сигурно се лоши вести.