Предновогодишно интервју со Даниел Аврамовски: Во моето семејство секогаш се сакал еден клуб – Вардар мора да биде на евро сцената!

Кога никој не очекуваше Вардар оваа сезона игра одличен фудбал и на полусезоната црвено-црните се лидери со осум бода предност во однос на Шкендија, а еден од предводниците на четата на Александар Васовски е Даниел Аврамовски.

Аврамовски во првиот дел од сезоната постигна девет гола и со тоа е најдобар стрелец во македонското првенство. Ова лето после неколку години во кои настапуваше за Црвена Звезда, ОФК, Олимпија Љубљана и Војводина Аврамовски се врати во македонското првенство. Претходно во Македонија го носеше дресот на Работнички и Македонија Ѓорче Петров.

Во пресрет на новогодишните празници разговаравме на неколку интересни теми.

• Неколку години игравте надвор од државата, оваа година се вративе и очигледно не погрешивте. Што беше пресудно да го изберете Вардар и да се вратите во македонскиот фудбал?

– Да, неколку години бев надвор од државата и тоа е големо искуство за мене. Моменталната ситуација покажува дека не сум погрешил што се вратив во македонкиот фудбал, се вратив поради многу причини како фудбалски така и приватни. За да напредуваш како фудбалер мораш пред се да бидеш добро прифатен од своите соиграчи, од стручниот штаб, од навивачите на клубот и луѓето кои го водат клубот. Јас сум многу благодарен на нив и на мојата сопруга која е ми е голема поддршка, а исто така и на мојата фамилија. На мене да им возвратам со добра игра и добар однос на теренот и надвор од него.

• Имавте ли во текот на летото други понуди освен оваа на Вардар?

– Во текот на летото имав неколку понуди одлучив да останам во Вардар. Од мали нозе моето семејство навивало и се сакал еден клуб, а тоа е Вардар. Исто така мислам дека Вардар може и мора да биде на евро сцената во наредните години. Видовме дека неколку балкански екипи како Звезда и Динамо успеаа би било убаво за Македонија и македонскиот фудбал да има клуб кој се натпреварува во групната фаза од европските натпреварувања, а со голема посветеност и многу желб и цел која секој треба да ја има може да се постигне се.

• Во Црвена Звезда започнавте одлично и постигнавте гол на дебито против Суботица. Што се промени потоа?

– Во Звезда пристигнав како многу млад и се почна како од бајките и одиграв неколку одлични натпревари. Отидов во една средина во која ако малку скршнеш од вистинскиот пат понатаму не е се исто. Токму кога започнав да се навикнувам на градот и тренинзите, ете и на тој натпревар се чуствував како да играв пет години таму, а не само три месеци. Потоа дојде една работа која е составен дел од фудбалот, а тоа се повредите, но секако дека тој период има посебно значење за мене. Јас секогаш гледам позитивно и што и да се случи јас сум задоволен. Исто така мислам дека се се случува со причина. Потоа бев во Олимпија Љубљана, па во Војводина и таму запознав пријатели од кои научив многу.

• Можете ли да изберете еден играч од Вардар со кој имате посебен однос?

– Најискрено сите меѓусебе имамем одличен однос и не би сакал никого да издвојам затоа што пред се сите се предобри личности и сите ние функционираме како едно семејство. Можам само да кажам дека кога сме во карантин исто сите сме заедно, но повеќе време поминувам со Марио Младеновски и Филип Илиќ затоа што ние сме единствени кои пред натпревар слушаме различна музика од сите други.

• Кога сите мислеа дека Вардар ќе се мачи тимот со вас како еден од лидерите игра во супер форма и е на добар пат да ја освои титулата, која е причината што гледаме еден ваков одличен Вардар?

– Секако дека многу не веруваа во нас, секој си има свое мислиење и секој различно гледа на ситуациите како на теренот така и надвор од него. Најважно е ние самите да веруваме во себе и во нашиот квалитет и оваа полусезона покажавме дека во Вардар има фудбалери кои имаат голем карактер и потенцијал за многу повеќе и се ова е голема заслуга на целиот стручен штаб кој со својата посветеност и внимание прдионе за досегашните резултати.

• После одличните настапи во првенството добивте и повик во репрезентацијата. Очекувате ли дека и понатаму ќе бидете дел од нашата најдобра селекција?

– Добив повик и пресреќен сум. Желба на секој фудбалер е да игра за земјата која ја сака и во која е роден. Мое е и понатаму да продолжам да играм и секако ќе ми биде голема чест ако и понатаму бидам дел од репрезентација.

• Како потенцијален репрезентативец и учесник ако Македонија се пласира на ЕП. Како би ја искоментирале можноста да играме во група со Португалија, Франција и Германија? Втората можност се Холандија, Украина и Португалија.

– Тоа се репрезентации со голем стаж на европските првенство и тоа би било секако уште едно големо искуство за секој репрезентативец и уште поголем мотив да се покаже во најдобро светло и сите заедно да го покажаме квалитетот како и во претходните натпревари.

• Сите сакаме да го победиме Косово и веруваме на такво нешто. Какви се шансите според вас?

– Видовме дека се работи за квалитетна репрезентација има еден натпревар кој ние го играм на домашен терен, со дисциплинирана игра како во претходните натпревари и со една голема поддршка од трибините се надеваме на добар резултат.

• И за крај, какви желби имате во новата година кога во прашање е Вардар и репрезентацијата?

– Жeлбите се да сме живи и здрави тоа е најважно, да продолжиме со добрите игри и во вториот дел од првенство, па на крајот да се радуваме сите заедно на успесите. Им посакувам на сите пријатели и и сите во Македонија среќни новогодишни и Божиќни празници.

Разговара: Стефан Даскалов

Фото: ФК Вардар