Последно коло од групната фаза во ЛШ: Кој е сигурен, на кого што му треба?

Денес започнува последното коло од групната фаза во Лигата на шампионите, а пред 12 екипи веќе си го обезбедија пласманот во нокаут фазата. Место има за уште четири.

Баерн Минхен, Арсенал, ПСВ Ајндховен, Реал Мадрид, Реал Сосиедад, Интер, Атлетико Мадрид, Лацио, Борусија Дортмунд, Манчестер сити, Ред Бул Лајпциг и Барселона се клубовите за кои ова последно коло нема резултатско значење.

Во групата „А“, Копенхаген, Галатасарај и Манчестер Јунајтед имаат шанси за второто место. Најдобра позиција пред почетокот на средбите има данскиот претставник на кого му е доволен бод против Галатасарај ако Јунајтед изгуби од Баерн. Ако Галатасарај победи, тогаш турскиот тим дефинитивно е во нокаут фазата. За Јунајтед да се надева на второто место мора да победи, меѓутоа и во таква ситуација ќе зависи и од исходот на средбата помеѓу Копенхаген и Галатасарај,

Наполи на Елмас има се во свои раце, па и со минимален пораз против Брага ќе бидат во осминафиналето.

Од натпреварите кои се играат утре Борусија Дортмунд во „групата на смртта“ веќе е осминафиналист, а во игра за второто место остануваат ПСЖ, Њукасл и Милан. Францускиот гигант со победа во Германија и дефинитивно ќе биде втор, а им одговара и ако Њукасл не го победи Милан дома. Англичаните мораат да победат, а ПСЖ да изгуби или да одигра реми против Борусија. Милан нема опција и мора да победи, но во исто време и ПСЖ да изгуби во Германија.

Последниот патник ќе го добиеме од директната пресметка помеѓу Порто и Шахтјор во групата „Х“. На португалскиот тим му одговара и реми бидејќи на првиот натпревар со Украинците славеа со 1:3.