Ништо од кам-бекот. Ракчевиќ не се договори со Металург

Црногорскиот пивот Младен Ракчевиќ нема да биде дел од екипата на Металург следната сезона. Тој одамна беше најавен, но како одминуваше времето, полека се ладеа и двете страни, а кога конечно дојде моментот да се финализира договорот, практично и двете страни беа на почеток на преговори, а не на нивниот крај.

Ракчевиќ дојде во Скопје и во директни разговори дојдоа до заклучок, дека е подобро да не почуваат соработка.

„Разговаравме со Јорданов и обострано засклучивме дека можеби е најдобро да не доаѓам. Имаа и тие свои и јас свои причини. Моите се повеќе семејни, ќерка ми почнува школо и сакам да бидам повеќе време со неа. Разговаравме отворено, фер.
Се разделивме екстра-коректно.
Понатаму ќе видам, можеби ќе почнам некој бизнис, можеби ќе одиграм уште една сезона. Имам некои понуди од Црна Гора, па ќе видиме“, изјави за г-спорт, Ракчевиќ.

Металург со ангажманот на Миличевиќ има три пивоти на располагање за следната сезона. Домашните Арсеновски и Лазаревски заедно со новодојдениот Хрват Миличевиќ, ќе формираат трио што ќе треба да ги изнесе на свој грб битките од Лигата на шампионите, СЕХА Гаспром и домашниот шампионат.