Мората: Жалам што го носев дресот на Реал Мадрид (видео)

Напаѓачот на Атлетико Мадрид, Алваро Мората ги разочара навивачите на Реал Мадрид, велејќи дека жали што го носел дресот на „кралскиот“ клуб.

Шпанецот од мал е фан на Атлетико, но својата фудбалска афирмација ја доживеа на „Сантиаго Бернабеу“, каде во два наврата го носеше дресот на Реал Мадрид.

„Кога бев дете, играв во Атлетико. Во детството чувствував притисок од тоа како се менува фудбалот. Затоа решив да одам во Гетафе за една сезона, а потоа во Реал. Жал ми е што носев други дресови во Шпанија, освен тој на Атлетико“, рече Мората за време на „лајв“ на Инстаграм.

„Но, јас со мојот татко одев на „Калдерон“ и навивав за Атлетико, сонував да играм таму. За жал, играв таму со други дресови, не со оној на Атлетико, но јас отсекогаш сум бил фан на овој клуб. Тоа што се случи во минатото, останува засекогаш“, додаде напаѓачот

Мората во моментов е во сопственост на Челзи од каде пристигна на 18-месечна позајмица, но информациите се дека „јорганџиите“ ќе ја искористат опцијата за негов откуп.