Мбапе ги отфрли информациите дека се договорил со Реал

Францускиот фудбалер Килијан Мбапе се уште е неодлучен за својата иднина, се вели во соопштението на неговиот менаџерски тим.

Дел од француските и шпанските медиуми изјавија дека 25-годишниот Мбапе ќе го напушти Париз на крајот од тековната сезона и дека кариерата ќе ја продолжи во Реал.

Инаку, веќе долги години одличниот француски репрезентативец е поврзуван со трансфер во мадридскиот клуб.

Сепак, менаџерскиот тим ги демантираше ваквите наводи и нагласи дека „Мбапе се уште ништо не одлучил за сопствената иднина“.

„Со оглед на тоа што Мбапе влезе во последните шест месеци од договорот со ПСЖ, тој е слободен да преговара со други клубови. Но, тој се уште не постигнал договор со никого, ниту пак некој му одредил рок“, изјавија од раководниот тим на фудбалерот.

Мбапе ја започна кариерата во Монако, а потоа дојде во ПСЖ на позајмица во 2017 година. Тој официјално стана член на парискиот клуб во 2018 година. Во ПСЖ постигна дури 166 гола на 192 првенствени натпревари.