Лејкерси после 10 години во конференциско финале?

Еден од главните фаворити за титулата во НБА – Лос Анџелес Лејкерс го помина својот втор тест на патот до златото.

Леброн Џејмс и компанија го победија Хјустон Рокетс со 119:96 во петтиот натпревар од полуфиналната серија и продолжуваат во следната фаза по вкупен резултат 4-1 во победи.

Леброн и соиграчите по првата четвртина имаа +15 (35-20) и уште тогаш можеше да се претпостави кој ќе биде победник.

Во еден момент беше и +30 (101-71) на стартот на последната четвртина, по што без многу проблеми Лејкерс се избори за финале.

Џејмс повторно беше предводник и постигна 29 поени, 11 скокови и седум асистенции, а имаше поддршка од Кајл Кузма со 17 поени. Најдобар кај Хјустон беше Џејмс Харден со 30 поени.