Колапсот на „моторот“ на „нероаѕурите“ причина за падот на Интер?

После поразот од Сасуоло во минатото коло стана јасно дека во Интер нешто не е во ред.

Лучијано Спалети по овој натпревар испрати јасна порака до фудбалерите на неговиот тим.

„Се наоѓаме во ситуација во која нешто мораме да менуваме. Некои фудбалери беа сигурно и се чуствуваа важно, а доколку некој не може да се носи со притисокот, ќе мораме тоа да преиспитаме“, изјави Спалети.

Еден од ние на кои сигурно мислеше Спалети е Хрватот, Иван Перишиќ кој има голем пад во формата и кој додека Интер победуваше беше „моторот“ на овој тим.

Последниот добар, всушност фантастичен настап, Перишиќ го имаше против Киево, натпревар кој се одигра на 2 декември оваа сезона. Меѓутоа потоа следуваше разочарувачки период и за Интер и за Перишиќ.

После оваа победа следуваше реми со Јувентус и порази од Удинезе и Сасуоло, но и разочарувачки настап во купот на Италија против третолигашот Порденоне тим против кој славеа после изведувањето на пенали. Во четири натпревари тимот на Спалети успеа да постигне еден погодок и тоа целосно неважен. Мауро Икарди постигна гол во поразот од 1:3 против Удинезе.

Кога во прашање е конкретно Перишиќ, кај него не може да се пронајде ништо позитивно во последните три недели. Неговите бројки се следните: 270 одиграни минути, 0 голови, 0 асистенции, 1 успешен дриблин, 2 употребливи нафрувања, 2 удари на гол, 5 креирани прилики и 18 изгубени дуели.

За неговите лоши настапи не може да е причина заморот, бидејќи Интер во декември не играше повеќе од еден натпревар неделно.