Карвахал со паненка го понижи Ливаковиќ, а потоа покажа КЛАСА

Репрезентацијата на Шпанија синоќа го освои трофејот во Лигата на нации откако во големото финале во Ротердам ја совлада Хрватска на пенали.

Решавачкиот пенал го изведе Дани Карвахал, кој со паненка го измами Доминик Ливаковиќ, но после тоа десниот бек на Реал Мадрид се покажа како голем џентлмен.

На финалниот натпревар меѓу Шпанија и Хрватска не видовме гол во 120 минути и натпреварот заврши со резултат 0:0, а потоа по изведувањето на пенали беше решен победникот во Лигата на нации.

Црвената фурија имаше повеќе знаење и среќа при изведувањето пенали и на крајот успеа да го подигне трофејот во Лигата на нации за прв пат во својата историја.

Трагичарите на Ватрени во пенал серијата беа Ловро Мајер и Бруно Петковиќ, чии удари ги одбрани Унаи Симон.

Кај Шпанците Ајмерик Лапорте беше единствениот непрецизен од белата точка.

Херој беше искусниот десен бек Дани Карвахал, кој го реализираше одлучувачкиот пенал во шестата серија и успеа на шпанскиот тим да го донесе трофејот во Лигата на нации на преполниот стадион Де Куип во Ротердам.

Иако стадионот беше преполн со хрватски навивачи, на крајот, помалата група навивачи на Шпанија кои отпатуваа во Холандија имаа повеќе причини за славење. Но, она што го направи Карвахал во таков момент навистина ги заслужи сите пофалби.

Ливаковиќ не беше ни блиску до одбрана на пеналот, но и самиот не беше подготвен за одлуката на Карвахал. Имено, Карвахал ја зеде топката и успеа да го надмудри Ливаковиќ и со гол да го реши овој натпревар.

Но, набргу потоа, десниот бек на Реал Мадрид покажа за каков господин се работи. Откако накратко ја прослави победата со навивачите и соиграчите, реши најпрвин да му пријде на Лука Модриќ со кој настапува во Реал за да го утеши по поразот.

Карвахал потоа им подаде рака на останатите хрватски играчи и на одличен начин покажа дека е голем џентлмен.