Италија – Македонија: Да испишеме нова страница во историјата!

Македонија гостува во Палермо кај европскиот шампион Италија во бараж натпревар за пласман на Светското Првенство во Катар. Ова е историски меч за нашата селекција која за прв пат е толку блиску до пласман на еден Мундијал.

Македонија никогаш поблиску до еден Мундијал

Фудбалската репрезентација на Македонија е пред еден од најголемите предизвици во историјата и тоа веднаш по настапот на ЕУРО 2020. Пишуваме историја и тоа е  навистина нешто ново во македонскиот фудбал. Сега, се наоѓаме на само два чекори од пласман на Светското првенство – играме бараж и повторно за прв пат во историјата.

Македонија немаше среќа во жрепката – полуфинале со Италија, па ако минеме финале со Португалија или Турција. Аутсајдерската улога е голема, но тоа во многу наврати предходно не ни било пречка да им ги расипеме сметките на големите фаворити. Влогот е голем, но за вакви натпревари се живее и нема никаква дилема дека Милевски и момците во црвено-жолти дресови ќе дадат и повеќе од своите сили за да забележат поволен резултат.

Можеби ниту тоа нема да биде доволно против актуелниот европски шампион, но ако одиграме онака како што игравме изминатите натпревари тогаш се е можно. Голема улога на вакви натпревари има и среќата, за која се надеваме дека овој пат ќе биде на наша страна.

Сер Боби во одлична серија со Македонија

По преземањето на селекцијата од страна на Благоја Милевски, очекувано беше да дојдат и промени во играта. Селекцијата е речиси иста, но пристапот сега е поразличен. Сер Боби е предводник на седум натпревари, на кои забележа еден пораз и по три ремија и победи. Поразот е против Германија, додека славевме над Лихтенштајн и на последните два квалификациски меча против Ерменија и Исланд. Токму тие два меча беа нашите најдобри под водство на Милевски. Прво се случи победата од 0:5 над Ерменија во гости, па во решавачкиот меч и победата дома над Исланд со 3:1. Доколку Македонија одигра како на тие два меча, тогаш може да се надева на чудо во Италија, иако сега ќе бидеме ослабени поради суспензијата на најдобриот – Елмас.

Без Елмас ќе биде пеколно тешко во офанзивата

Без Елмас ништо нема да биде исто. Како одминува времето, играта на Македонија се повеќе зависи од Елмас, без разлика што селекторот постојано повторува дека победува колективот. Колективот секако е најбитен, но секогаш мора да постои некој што ќе знае да повлече. Сега без Елмас, таа задача ќе падне на некој друг – можеби Барди, Трајковски или пак Адеми, но овој последниот е повеќе дефанзивец од офанзивец.

Неиграњето на Елмас ќе биде голем проблем, но добро е тоа што на страничните позиции ги имаме Трајковски и Чурлинов. Трајковски добро ги знае италијанците откако долго време помина во оваа земја и на истот стадион – во Палермо. Чурлинов пак се наоѓа во добра форма, стандарден е во Шалке и веќе има неколку гола и асистенции зад неговото име. Ако ја пренесе играта од Шалке и во репрезентацијата на Македонија тогаш многу нешта ќе бидат полесни.

Во средниот ред ќе фали Костадинов кој беше стандарден на предходните натпревари. Но, добро е што Адеми се опорави и ќе настапи на овој меч заедно со Барди и веројатно Николов во средината, иако во овој дел може да има и изненадување па да стартуваат некој од останатите – Ракип, Атанасов или Бабунски. Одбраната е веќе позната, а нивната постојаност треба да ни ја олесни задачата бидејќи тие долго време играат заедно во селекцијата. Во нападот, веројатно ќе стартува Милан Ристовски кој одигра одлично на предходните натпревари.

Светското првенство не би било исто без европскиот шампион, но …

Неуспехот да се пласира на Светското првенство во 2018 година беше болен за Италија, но тие како да заборавија дека една од причините за тој неуспех беше токму Македонија. Откако победија во тие квалификации со 2:3 во Скопје, на реваншот во Италија беше 1:1.

Италија заврши втора, па во баражот не успеа да се снајде и го пропушти Мундијалот. Сепак, изминаа четири години од тогаш и има значителни промени во селекцијата, која на минатото ЕУРО го крена пехарот. Би било навистина трагедија оваа селекција да не обезбеди пласман на Светско првенство дв апати по ред, особено што сега станува збор за актуелен Европски шампион.

Од таа гледна точка, би било навистина чудно европскиот шампион да не настапи на Светско првенство. Можеби од таму е сигурноста во составот кој е убеден дека ќе ја мине Македонија, иако многумина во Италија предупредија дека тоа може да им се одбие од глава.

Лошата форма не го загрижува Манчини

Голем број есенски потреси придонесоа Аѕурите да завршат на второто место во групата Ц со два бода помалку од лидерот во групата Швајцарија – бидејќи тимот на Манчини забележа само една победа од последните пет натпревари во групата, а ремизираше на четири од нив.

Додека победниците на ЕП 2020 одиграа без голови на последниот меч во Северна Ирска, Швајцарија славеше со 4:0 над Бугарија за да ја принуди Италија да се задоволи само со место во плеј-офот.

„Аѕурите“ никогаш не пропуштиле Светското првенство двапати по ред – брзо се квалификуваа во 1962 година, откако не се пласираа во 1958 година – и тие се една од двете селекции во баражот што ја поминаа својата групна фаза без пораз – другата е Украина.

Бројката од само две победи од нивните последни седум меча во сите натпреварувања е секако непозната глетка во италијанскиот фудбал, но тие зачудувачки никогаш не загубиле натпревар од квалификациите за Светското првенство на свој терен и влегуваат во натпреварот во четврток како голем фаворит.

Без големи изненадувања во составот

Немаше вистински изненадувања во италијанскиот состав, иако Џовани Ди Лоренцо не беше повикан поради повреда и беше заменет со Матија Де Шиљо, кој ќе се бори со Алесандро Флоренци за позицијата десен бек.

Жоао Педро, Луис Фелипе и Матија Закањи можеби се мало изненадување во составот за овој клучен натпревар, но Манчини сигурно ќе се потпре на својата искусна екипа на нивните позиции. Марко Верати се врати откако поради повредата на колкот ги пропушти последните натпревари во Ноември.

Леонардо Бонучи е повикан и покрај тоа што помина неколку недели надвор од теренот поради повреда на потколеницата, така што Алесандро Бастони веројатно ќе стартува во одбраната, а учеството на Џорџо Кјелини во составот е исто така сомнително поради неговите проблеми со повреди во изминатиот период. Тука е потенцијалниот проблем на Италија. Бастони ќе игра со Мансини во одбраната, а тие двајца никогаш предходно не играле заедно на еден натпревар и тоа ќе биде шанса за Македонија.

Можен почетен состав на Италија:

4-3-2-1: Донарума; Флоренци, Бастони, Манчини, Емерсон; Жоргињо, Барела, Верати; Берарди, Инсиње; Имобиле.

Можен почетен состав на Македонија:

4-3-2-1: Димитриевски; С.Ристовски, Велковски, Муслиу, Алиоски; Николов, Адеми, Барди; Чурлинов, Трајковски; М.Ристовски.