Дерби на денот: Јунајтед сака да му ги расипе плановите на Ливерпул

Два гиганти на англискиот фудбал, кои се борат за различни цели на крајот на сезоната ќе играат еден против друг во вечерва, кога Ливерпул ќе го пречека Манчестер Јунајтед на Енфилд во рамки на заостанат натпревар од 30-то коло.

Тимот на Јирген Клоп влегува во дуелот откако штотуку го резервира своето место во финалето на ФА Купот по победата над Сити, додека „црвените ѓаволи“ се изнамачија во победата од 3:2 во лигата против Норвич Сити.

Ливерпул конкурентен во сите натпреварувања

Една домашна титула е веќе пред портите – онаа во ФА Купот, а воедно тие се на само 270 минути од седмата круна во Лигата на шампионите, па сега навивачите на Ливерпул со секоја измината недела стануваат се поголеми оптимисти за можна четворка сезонава.

„Црвените“ го исфрлија Манчестер Сити со три брзи гола во нивното полуфинале во ФА Купот – два за Садио Мане и уште еден гол со глава на Ибрахима Конате. Избраниците на Пеп Гвардиола не можеа да предизвикаат пресврт и покрај тоа што се вратија во игра со головите на Бернардо Силва и Џек Грилиш.

Што се однесува до Премиер лигата, Ливерпул минатото коло одигра уште еден меч со Сити на гости и освои бод во рмеито 2:2, па сега разликата е непроменета и Сити има еден бод предност.

Тежок е овој велигденски период за тимот на Клоп. Одиграа два меча со Бенфика, два меча со Сити и сега играат со Манчестер Јунајтед, но овој период може да даде одговори на многу прашања поврзани со Ливерпул сезонава и може да донесе титули.

Ливерпул не губи бодови на Енфилд

„Црвените“,постигнаа најмалку два гола на секој од нивните последни пет натпревари на континентално и домашно ниво и имаат извонредни 10 победи по ред на „Енфилд“ во Премиер лигата – ниту една англиска прволигашна екипа не се претставила подобро од нив на домашен терен оваа сезона.

Пред овој меч се е на нивна страна, освен можеби малиот замор. Но ако Клоп сака титули, тоа не смее да биде проблем за тимот на Ливерпул. Пред овој меч тој може да смета на целиот ростер, бидејќи ниту еден фудбалер не е повреден или суспендиран, а тоа е реткост сезонава.

Широкиот ростер на квалитетни фудбалери, на крајот може да се покаже како пресуден во борбата за титули на повеќе фронтови.

Роналдо се разигра

Често етикетиран како проблем во Манчестер Јунајтед оваа сезона, Кристијано Роналдо беше повторно брилијантен и ги демантираше неговите критичари минатото коло на гостувањето кај Норвич Сити. Со два гола на Роналдо во првото полувреме веќе беше 2:0, за потоа Норвич да израмни.

Сепак, во 76-та минути, Роналдо од слободен удар го постигна својот 60-ти хет-трик во кариерата и донесе три бода за Манчестер.

Победата над најголемиот кандидат за испаѓање Норвич претставува само втора победа од осум дуели во сите натпреварувања. Уште еден негативен податок во оваа серија е тоа што од Декември тие не ја зачуваа мрежата чиста на гостувањата во Премиер лигата.

Ниту еден навивач на „црвените ѓаволи“ не сака да се потсети на срамот од 0:5 што им го приреди Ливерпул уште во Октомври, така што одмаздата сигурно ќе биде во главите на гостите оваа недела, но тие не успеаја да забележат победа на „Енфилд“ во ниту еден меч од 2016 година и само еднаш ја погодија мрежата на теренот на нивните ривали во последните шест средби.