Дерби на денот: Може ли Спортинг да го запре Арсенал?

Денес на програмата се натпреварите од осминафиналето во Лига Европа, а секако во фокусот ќе биде дербито во Лондон помеѓу Арсенал и Спортинг Лисабон.

Првиот меч во Лисабон беше одлично надигрување на два офанзивни тима, па заврши реми со конечни 2:2. Тоа значи дека се е отворено пред реваншот во Лондон, но Арсенал секако е фаворит поради предноста од домашниот терен.

Арсенал е фокусиран на Премиер лигата, но…

Арсенал игра сезона каква ниту најголемите оптимисти не можеа да замислат. Најпрво се мислеше дека тоа е само одличен старт на сезоната и дека „топџиите“ ќе паднат после Мундијалот, но тимот на Артета покажа одличен континуитет. „Топџиите“ моментално се лидери на табелата во Премиерлигата и сигурно тоа е главната цел, да се освои титулата после долги години. Имаат млад тим, полн со квалитет и гладен за успех, па сигурно нема да ја потценат Лига Европа. Арсенал супериорно ја освои групата и се пласира во осминафинале, а во првиот меч во Лисабон покажа дека и тоа како му значи Лига Европа, иако главниот фокус е на Премиер лигата. Арсенал е секако фаворит на овој меч бидејќи „топџиите“ играат фантастично на домашен терен. Оваа сезона до сега одигра 16 меча на „Емирати“ во Премиер лигата и Лига Европа и остварија дури 13 победи. Што се однесува до тимот, Артета за овој меч нема да може да смета само на Елнени и Нкетија, кои се повредени.

Спортинг немаше среќа во ждребот

Спортинг оваа сезона игра многу послабо во споредба со претходните две сезони кога ја освои титулата во Португалија. Меѓутоа, второто место на табелата не е лош резултат бидејќи тоа носи директен пласман во Лигата на шампиони, што е главната цел на овој тим. Тимот од Лисабон одлично се претстави оваа сезона во групната фаза од ЛШ, но немаше среќа. Во последното коло само минути го делеа од пласман во следната фаза, но за жал заврши на третото место и мораше да продолжи во Лига Европа. Спортинг немаше среќа ниту во ждребот бидејќи во осминафиналето го доби еден од главните фаворити за титулата. Во претходното коло супериорно го елиминираа Митиланд, а во првиот меч против „топџиите“ покажаа дека нема лесно да се откажат. Иако оваа сезона многу тешко може да се победи на Емирати против Арсенал, сепак тимот од Лисабон знае дека може да ја оствари целта после продолженија или пенали. Поради тоа се очекува тренерот Аморим да игра претпазливо, да се фокусира на одбраната и да се заканува преку контранапади.Што се однесува до тимот тој поради повреда нема да може да смета на Коатес, Белерин и Морито.

Очекување

Дуел на два тима кои играат сличен фудбал, за гол повеќе од противникот, но сега влогот е голем и се очекува да играат претпазливо. Арсенал е фаворит поради домашниот терен, но Спортинг сигурно нема лесно да се предаде.