Дерби на денот: Може ли САД да ги расипе сметките на Холандија?

Денес започнува втората фаза од Мундијалот односно осминафиналните дуели, а програмата ќе ја отворат репрезентациите на Холандија и САД.

Холандија ги оправда очекувањата и го освои првото место во групата А каде беше голем фаворит, додека САД се избори за второто место во групата Б и обезбеди осминафинале, што реално е голем успех за оваа репрезентација.

Холандија и покрај првото место не воодушеви

Холандија беше во лесна група и беше голем фаворит, па го освои првото место, меѓутоа не воодушеви многу со играта. Четата на Ван Гал сигурно има големи амбиции на овој Мундијал, а во осминафиналето има противник по мерка и повторно е фаворит. Холандија имаше големи проблеми против Сенегал и го скрши отпорот дури на крајот, а против Еквадор одигра 1:1, но лесно можеше да биде поразена. „Лалињата“ се справуваат одлично на дефанзивен план, но во трите меча упатија само 8 удари во рамките на противничкиот гол. Меѓутоа, формата на Коди Гакпо ја засенуваа оваа слаба статистика, бидејќи ѕвездата на ПСВ постигна три гола на три натпревари. Холандија е во низа од 18 натпревари без пораз, последниот пораз го имаше во осминафинале од ЕП 2020 година. Тоа му дава голема самодоверба на тимот, па се освен пласман во четвртфиналето ќе биде разочарување. Ван Гал на располагање ги има сите фудбалери, нема проблем со повреди, па не се очекува да прави промени во тимот.

САД ја оствари примарната цел

САД има млада репрезентација која треба зенитот да го достигне на следното Светско првенство кога ќе бидат домаќини. Целта на овој Мудијал беше да изборат пласман во нокаут фазтата, па примарната цел е остварена. Сепак, Пулишиќ и другарите сигурно нема лесно да се предадат во осминафиналето и ќе се потрудат да направат уште едно изненадување. САД одигра реми против Англија и запиша важна победа против Иран, која им овозможи да се пласираат во нокаут фазата. Лошата вест беше дека на тој меч се повреди првата ѕвезда Кристиан Пулишиќ, сепак последните информации се дека играчот е рехабилитиран и спремен за овој меч. Американците имаат лоша статистика против европски репрезентации на Мундијалите и последната победа ја имаат во 2002 година. Селекторот нема проблем со повредени фудбалери и се очекува да започне со Пулишиќ во стартниот тим, па сигурно ќе се обидат преку контранапади да ја казнат Холандија и да се пласираат во четвртфинале.

Очекување

Холандија е голем фаворит на овој меч и сигурно од самиот старт ќе се обиде да ја контролира играта и да дојде до брзо водство. Меѓутоа САД нема лесно да се предаде и ќе се обиде да постигне гол преку контранапади.