Време е за големото финале: ПСЖ за историја,Баерн за престиж

Долго очекуваното финале во Лигата на Шампиони ќе се одигра во недела. ПСЖ – Баерн Минхен, дуел на две екипи кои без сомнеж покажаа најмногу сезонава во европската елита и дуел кој ќе ни донесе еден атомски фудбал, голема борба, неизвесност.

Баерн е благ фаворит, но може ли некој да биде јасен фаворит против екипа чиј напад го предводат Мбапе и Нејмар.

ПСЖ конечно дел од големото финале

ПСЖ го обезбеди своето прво финале во Лигата на Шампиони по заслужената победа од 3:0 над РБ Лајпциг во забавното полуфинале. Еден од најбогатите тимови во Европа и секако еден од најголемите трошачи, конечно ја искористи својата можност и со головите на Маркињос, Анхел ди Марија и Хуан Бернат славеше комотна победа.

Тимот на Томас Тухл беше добро составен, имаше хомогеност помеѓу играчите и делауваше самоуверен. Ди Марија и Мбапе се вратија на одличен начин по паузата поради повреди и тоа го стартуваа мечот, додека клучниот играч од средниот ред Марко Верати влезе од клупата. За финалето, Верати ќе биде подготвен за 90 минути. Но, Идриса Гуе и Кејлор Навас остануваат со своите повреди и нивниот настап во недела е под знак прашалник. Голем проблем може да биде неиграњето на голманот Навас, но Рико си ја заврши својата работа на одличен начин против Лајпциг и се покажа како достојна замена за Навас.

Баерн Минхен со сезона од соништата

Немилосрдниот марш на Баерн Минхен во текот на оваа сезона во Лигата на шампионите продолжи со тоа што тие на лесен начин го совладаа и Лион со 3:0 за да резервираат 11-ти настап во финалето на ова натпреварување. Победата беше 20-та за германски гиганти по ред и нивна максимална 10-та победа во Лигата на Шампиони оваа сезона, изедначувајќи го рекордот во конкуренцијата. Со победа над ПСЖ ќе постават рекорд, кој веројатно ќе остане недостижен и во многу подалечна иднина.

Баварците беа слаби на почетокот од дуелот во средата, дозволувајќи му на Лион да има две одлични шанси за гол, но за среќа на германците, фудбалерите на Лион не беа сконцентрирани во почетната четвртина, пред  Гнабри да постигне гол за водство, потоа и да го зголеми. Левандовски ами ги постави конечните 3:0 пред крајот на мечот. Ако на овој меч се додаде и неверојатната победа од 8:2 над Барса, победа која ја раздрма цела Европа, тогаш јасно е во каква форма е тимот од Баварија.

Флик руши рекорди

Победата на Баерн беше крај на онаа црна серија на германскиот тим и поразите во последните четири полуфиналиња во Лигата на шампионите. Исто така, победата над Лион ги одржува на курс по трофеи во ѕвездената деби кампања на Флик како тренер. Под негово водство, Баерн има неверојатен скор од 28 победи, едно реми, без ниту еден пораз, постигнувајќи 97 голови за време на истата низа. Тоа значи дека под водство на Флик, Баерн Минхен постигнува во просек по 3.5 голови по натпревар.

Германскиот гигант фаворит во обложувалниците

ПСЖ и Баерн се сретнаа осум пати во Лигата на шампионите при што Баерн победи три пати, а ПСЖ има пет победи. Последен пат овие две екипи играа меѓу себе во групната фаза во сезоната 2017/18 и на два пати победи домаќинот со идентични 3:1.

Коефициентот за ПСЖ е околу 3.20 и покрај тоа што ова екипа важеше за еден од фаворитите во ова натпреварување уште од почетокот на сезоната. ПСЖ има 25 победи, 3 ремија и само еден пораз во сите натпреварувања од декември, вклучувајќи ги победите над Лион, Дортмунд, Аталанта и РБ Лајпциг во рамките на нивните последни седум натпревари од март. ПСЖ несомнено ќе има свои шанси во недела, особено што ги има одличните Мбапе и Нејмар кој кој го предводат нападот против Баерн.

Од друга страна, коефициентот на Баерн Минхен е околу 2.00. Баварците покажаа непоколеблива немилосрдност и интензитет со кои лесно доаѓаат до победите, но ова е финале и јасно е дека ќе им биде потешко за разлика од предходните дуели.